مايحكمش

كل ليل طويل و له أخر
و بحور الصبر هنعديها للأخر
و إذا كان فيكي يا بلد رمق و لو أخر
مايحكمش
أبوابنا فتحوها علي الأخر
و خيرك و نهبوه علي الأخر
كلمة بقولها لك من الأخر
مايحكمش
ضباع علينا نعاج أمام الآخر
تنكيل و ذل لينا و سماسرة للآخر
حابسين وطن كامل لخدمة الآخر
مايحكمش
تجويع و غربة و شقي و برضه نغرق في الأخر
و من فساد لفساد بيبرطعوا علي الأخر
انطقي و عرفيني مستنية ايه في الأخر
مايحكمش
اللي كبر و ادمن النفاق من الآخر
شبع و جاتله تخمة و عن هبر الطعام ما يتاخر
في عرفه مانسويش و يستهزئ بينا و بضحكه علينا يتفاخر
مايحكمش
أه يا بلد و أيه وصلك في طابور الدنيا للأخر
و خربها و قعد علي تلها راخر
مش راح تقولي بقي لأ و تصرخي علي الأخر
مايحكمش

الي ضحايا العبارة و الطيارة و العمارة

نغرق في بحر م السكات
نعيش.. أموات
نحلم ساعات
و لما نصحي
نعرف أن الوقت فات
و أخد معاه أجمل حاجات
كل الحاجات
السواقي.. البيوت الدافية.. الغيطان
و الشجر الملفلف علي الحيطان
السما و هي حبلي بالغيوم
قطيفة زرقا مرصعة بالنجوم
هوي الحسين ببخور معطر
عيون صبايا
نظرتها تسكر
بياع زلابية و فطير بسكر
و حاجات كثيرة مش فاكرها
كانت بتسحر
فجأة فص ملح و داب
لأ مش فجأة قوي
دي اختفت بشويش
حتة حتة
بدراسة جدوي وخطة
و اسامي في بنوك سويسرا
لها ألف حساب
و احنا شايفين
و الرضا علامته السكات
و احنا عارفين
ان صوت الحق مات
لما ملي حلوقنا الخرس
لما نسينا نلعنه
ملعون يا داء الخرس
ملعون في كل كتاب
يا ذل السكات
و كان طبيعي
نصبح ضحايا العبارات
و الطيارات
نموت بدال ما نحيا
في المستشفيات
فنسكت أكتر
و ضحكة التعلب صوتها يكبر
التعلب اللي فات فات
وفي ديله كل العصابات
ملعون ألف مرة يا ذل السكات