masreya

Tuesday, February 07, 2006

الي ضحايا العبارة و الطيارة و العمارة

نغرق في بحر م السكات
نعيش.. أموات
نحلم ساعات
و لما نصحي
نعرف أن الوقت فات
و أخد معاه أجمل حاجات
كل الحاجات
السواقي.. البيوت الدافية.. الغيطان
و الشجر الملفلف علي الحيطان
السما و هي حبلي بالغيوم
قطيفة زرقا مرصعة بالنجوم
هوي الحسين ببخور معطر
عيون صبايا
نظرتها تسكر
بياع زلابية و فطير بسكر
و حاجات كثيرة مش فاكرها
كانت بتسحر
فجأة فص ملح و داب
لأ مش فجأة قوي
دي اختفت بشويش
حتة حتة
بدراسة جدوي وخطة
و اسامي في بنوك سويسرا
لها ألف حساب
و احنا شايفين
و الرضا علامته السكات
و احنا عارفين
ان صوت الحق مات
لما ملي حلوقنا الخرس
لما نسينا نلعنه
ملعون يا داء الخرس
ملعون في كل كتاب
يا ذل السكات
و كان طبيعي
نصبح ضحايا العبارات
و الطيارات
نموت بدال ما نحيا
في المستشفيات
فنسكت أكتر
و ضحكة التعلب صوتها يكبر
التعلب اللي فات فات
وفي ديله كل العصابات
ملعون ألف مرة يا ذل السكات

9 Comments:

  • بالرغم من إن البوست يحمل شكوى وضيق وهم وغم .. إلا إن عجبني ماذكرتيه عن الحاجات الحلوة اللي مفقودة

    By Blogger Ahmed Shokeir, at 11:13 AM  

  • ملعون ألف مرة يا ذل السكات... ملعون ألف مرة يا ذل السكات... أنا برددها وبضم صوتي لصوتك... ملعون ألف مرة يا ذل السكات... بس عارفة،
    عايز أقول
    عايز أقولك
    مين هيسمع
    مين يا ست الكل يقدر
    ما يتكويش بنار بتلسع
    عجوز بعمة قاعد في بيته
    كل إللي ليه
    يزرع وياكل من زرع غيطه
    وتاني راجع بالمهية
    وكوم عيال وراهم ولية
    وشاب نفسه في الفجر يطلع
    يلاقي شغله وفيها يلمع
    شحات بيسرح بلبس مهري
    عايز جنيه ياخده ويجري
    مين هيقدر عالذل ده
    مين هيرضى بالقهر ده
    لازم نقوم لازم نحرك
    فينا الجراءة فينا اللسان
    لازم نشيل عنه اللجام
    لازم ما نسكت ع الحق لحظة
    عايز نقوم وعايز صوات
    فين الولاد وكل البنات
    فين اللي زهقوا من الذل فين
    ملعون ألف مرة يا ذل السكات

    By Blogger Dr. Hussein Magdy, at 2:33 PM  

  • اشكرك على الكلام اللى كتبتية


    وربنا يرحم الشهداء ويدخلهم الجنة برحمتة

    ويجب الا يعدى الامر ويمر مرور الكرام ويجب محاسبة المسئؤلين عنة

    وحسبى الله ونعم الوكيل

    الى الاما عزيزتى

    By Blogger tamer, at 7:17 PM  

  • اللللــــه ياإيمان
    حلوة مش كفاية عليها
    كأن صلاح جاهين صحى مخصوص علشان يكتبها
    فعلا المعاناة والألم بتخلق فن أصيل, جميل وراقى يكشف حقيقتنا ويعرى عيوبنا
    عشان نفسه يطهرنا
    حتى لو إحنا مش عايزين
    وملعون ألف مرة ياذل السكات وياكل العصابات

    By Blogger MASRY, at 7:38 PM  

  • من القلب أوى يا إيمان

    By Blogger Eman M, at 7:23 PM  

  • زجل رائع جداااااااا
    بس ما تسكتيش علي اللي اخذوا ذكرياتنا الحلوة و لا احنا نفضل ساكتين
    و نحاول نعيش حياتنا زي ما عايزنها

    By Blogger shortcut, at 9:57 PM  

  • جميل جدا وملعون الف مرة يا ذل السكات و ملعون يا خوف الناس

    بوست رائع

    By Blogger محمد ياسر, at 11:15 AM  

  • يعيش الغلابة ف طى النجوع
    نهارهم سحابة و ليلهم دموع

    By Blogger احمد فوزى, at 11:24 PM  

  • انا فعلا مش عارف اقول ايه، انا فعلا كل ما بقرأ حاجات المدونين المصريين بحس ان فيه امل.
    ملعون يا ذل السكات

    By Blogger DoNTPLaYFaiR, at 8:14 AM  

Post a Comment

<< Home