masreya

Tuesday, October 04, 2005

قلبي مات

فضل سنين جعان كلام
و لما مات
شبع مرة واحدة م السكات
ومن سكات
بلع لسانه
و خبي جوه الدولاب
ابتسامة و دمعتين
و صور جميلة لذكريات
عن شاب أسمر
كان لما يظهر
يرقص و يبكي م الفرح
يموت و يحيا م السهر
يجري و يلعب
يحضن نسايم
لساها فايتة علي الشجر
و لما يتعب
يرجع بين ضلوعي يبات
بعد اما يمشي علي القمر
يرسم دواير
ويبعت رسايل
للطير الللي داير
يغني في ليله
الللي حاير
و قلبي
من كتر الحنين
تخلص من فوق شفايفه
كل ال أهات
فيرجع لحضني
و يحلم بالتبات
و طعم سكر النبات
و يحب ناس
مروا ف حكاوي قبلنا
و زينا كانوا هنا
و طرحت قلوبهم
صبيان شقية و بنوتات
بس اما مات
معرفتش فين احطه
في حضني برضه
و لا في مكان بعيد
بٌعد السما
بَعد المدي
عشان نفسي بجد
بالعربي و بكل اللغات
كل يوم
لما اصحي م النوم
انسي حقيقة
انه مات

10 Comments:

  • so touchy ...
    is there a political sense here or I am only imagining things…

    By Blogger حازم فرجانى Hazem Fergani, at 6:44 PM  

  • لا لم تتخيل
    الحقيقة كنت أخشي ألا يكون المعني واضحا، لكن تعليقك طمئنني، فما قصدته كان قلب الأمل في مصر و المصريين اليوم

    By Blogger ايمان, at 4:24 AM  

  • gamela awi

    By Blogger Eman M, at 4:53 AM  

  • مش وحشة

    By Blogger sydalany-وش مكرمش, at 5:25 PM  

  • الله يا ست ايمان

    By Blogger Zeryab, at 12:33 AM  

  • ماهو برده مات
    مافاضلش لينا غير أهاته
    و السكات
    و صوت سكاته
    بعد الأهات
    أللى كانوا معاه يباتوا
    بس ماخدهومش ف مماته
    و كأنهم قدر و نازل
    ع العباد
    KING TOOOT

    By Blogger KING TOOOT, at 4:22 AM  

  • مصرية
    شعرك ممتاز و كله أحاسيس و مشاعر دافية ,, أنتى موهبه حقيقية ,, أكتبى و أمتعينا بحاجات تانية و الى الأمام دائما ً أن شاء الله
    KING TOOOT

    By Blogger KING TOOOT, at 4:24 AM  

  • الحقيقة أنا أرتجلت الكلام بعد احساس بقسوة اليأس لما يقتل القلب و يطفي وهج الحياة
    لا ازعم انني موهوبة أو لي اي مقدرة شعرية ، فشكرا للجميع علي كلماتهم الرقيقة

    By Blogger ايمان, at 4:45 AM  


  • القلب لا يموت فهو نبض الحياة الذي بدونه تنتهي كل شئ
    انصحك بالذهاب لاحدى المظاهرات الاخذة في الانتشار لترين اطفال وشباب وشيوخ وهم يتحركون بأمل لا يعرفونه ولهدف لا يصدقون انهم سيصلوا اليه ولكنهم مع ذلك ممتلئون حيوية ونشاط لا يمكن ان تروى الا من دماء قلب حي نابض

    By Blogger Darsh-Safsata, at 9:33 AM  

  • جميييل جدا ياايمان

    اسعدنى وجودى هنا جدا

    ودايما متميزه يايمان

    By Blogger بنبونى, at 8:48 PM  

Post a Comment

<< Home