masreya

Thursday, March 01, 2007

فزورة

الفكر عندنا خطر
و المشي كمان لو مش مقتدر
لأن الطريق في بلادنا وعر
و كتر الحوادث خير دليل
علي جهلنا بفن القيادة الأصيل
في شغل السياسة
و الالتفاف
فيبقي السكون و عدم الحراك
هو الخيار
الأمثل
و يحق لك تعلن إنه اكتشاف
الوضع في بلادنا شديد الإختلاف
ميزة عن كل البشر
الصبر من صبرنا كفر
نقدر نجوع بشكل خرافي
و يجي يبرطع في خيرنا "الخرافي"
و نعمل وليمة
وتبقي عظيمة
لو رموا لنا كلنا كده علي بعضنا
لقمة قديمة ناشفة و حاف
الحلم في بلادنا احتراف
يقدر يكون علي قد المقاس
يعني حتي الحلم نعرف نفصله
و نقصره ونظبته و نضيقه
نقدر حتي منقربش منه من الاساس
منعرفش أبدا نحلمه
زي ما هو
خلقة ربنا
كبير و واسع و يطول السما
عويم في محيط امل
مش ممكن ده يبقي خبل
حلمنا لازم يكون
علي قد اللحاف
الفقير في بلادنا
يندهس في عز ضوء النهار
يموت يوافق يبايع يبيع
ملوش حق يعترض
ملوش حق الاختيار
يموت عيان قرفان غرقان
محروق مخنوق
ما هو كله موت و بديل للانتحار
حل جاهز سهل و سريع
مع إن ربنا قال لنا
انه لما خلق أدم و حوا
حبهم و اتمني لهم
ذرية صالحة تبني و ترعي
تعمل حاجات متقدرش
تعملها الملايكة
يعني ممكن تحب تكره تدوق الغلط
تاكله علي انه تفاح أو تبلعه زلط
تعصي و ترجع و تعصي و ترجع
المهم تعرف من قاموس الكلام
كلمة لأ
متخفش تقول في يوم من الأيام
كلمة حق
و هنا مربط الفرس
هو الإله ربنا و لا اسيادنا الحرس؟
يعني بصراحة
الجبن راحة
و لا تكون انسان من ربنا تستحي و تخاف
لو جيت في يوم سألك
غيرت أيه بأيدك و لا بعقلك
و يوم ما شهدت المظالم
و كأنك لا من سمع و لا من شاف
هتسكت؟ تحب اغششك الإجابة؟
خللي بالك هتكون لك إدانة
تحب تعرف هتقوله أيه؟؟
أقول لك؟
بلاش انت برضه زي كل الناس هنا
تهلفط كلام هنا و هنا
و لما ساعة الجد تيجي
بحق و حقيقي
.................تخاااااااااااااااااااااااااااااااااف

3 Comments:

  • مش عارفة إذا كنت هتعرفيني و لا لأ، بس أنا شفتك و لما شفتك هحسيت اني اعرفك من زمن. يمكن لو الناس بتصدق أسطورة الحياة الأخرى كنت قلت ان روحي قابلتك من زمان قوي. النهاردة قررت أخش البلوج علشان أشوف بتكتبي ايه، الغريبة إني كنت تقريباً عارفة من غير معرف، يمكن علشان روحي عرفتك من سنين،اصل روحي لما يتزهق مني ومن تكتيفتي بتقرر تسبني و تطير علشان تتنفس فشكلها كدة قررت تبقى عندك شوية.
    في حاجات كتيرة على بالي من كترها تايهه مني او يمكن انا اللي تهت منها لكن ده مش موضوعنا، الموضوع ببساطة اني مش عارفة ليه لما شفتك و كلمتك و قرتلك حسيت فجأة إني مش لوحدي، يمكن مش أصحاب لكن أصحاب جداً كنا إحنا في حيا أخرى. يمكن في ناس بيوهمونا اننا غلط و الزمن مبآش بتاعنا ولا هيكون لكني عارفة انها هتروء و تحلي امتى مش عارفة لكن ادينا بنحاول لأن الزمن الطيب جاي.سفروتة صاحبة الروح

    By Blogger littelsafrouta, at 9:10 AM  

  • اللة ياإيمان
    وضعت إيدك على الجرح تماما
    صحيح دة بيألمنا
    بس كمان بيدينا أمل فى الشفاء
    أصل لو معرفناش الجرح فين
    يبقى فعلا مفيش فايدة
    خالص تحياتى وشكرى على دفعك الدائم لى للكتابة

    By Blogger MASRY, at 4:21 AM  

  • كلام جميل
    بس بردة حايفضل الالحاد هو الحل

    By Blogger DeadinLife, at 12:48 AM  

Post a Comment

<< Home